Well smaddy bet bus for massa dem claim seh di St. Catherine queen couldn't place at all. Massa, now den money gone down di drain second she cum. Yes mi chile, smaddy seh the Catherine Queen 'ave di colour, di face and the appearance.
The power of Forbes
So massa dem mek Leoni Forbes get angry. Mi chile imagine di goodly lady a try fi concentrate as a judge and people jus a chat out dem marligrape. Massa she get up, look east look west bendover and massa wen she find di culprit she meck one flung. Massa everybody shet up dem mout same time.
A wah gwaan?
Lord mi chile people seh Lady G look like she weighty. Dem seh she look good, her body a seh one. Yes mi chile neyga people seh har face shine like wen butter rub 'gainst puss mout. A wonda a weh a gwane sah.
'Fired' for pork
Massa yu did know seh a certain entertainer weh wuk wid one heavy chest entertainer get fired cause him gone buy one patty weh dem claim seh pork meck. Yes mi chile di ras pour down fire fire pon di pork eater. Di most dreadful fire. Wat a sinting a gwaan inna di ras dem camp.
Up in arms
Wat a piece a tug and war wid Toddler and Tesah. Yes massa she claim seh a nuh Toddler lef her, a mean as artistes and manager, ah she lef him and how di article an di whole ting spwile up har character. Yes massa she vex so till.
Bull bucker Chuck
Den massa dem seh Chuck Fender tek sick cause weh happen to him ova so massa dem seh eh look like him a teck body cum back up pill. Massa the Warlord cum in like him a bull bucker and duppy conqueror. Dem seh nobody caan heal him. But nuh watch nuh face for Montel hear seh Fender nuh trouble nuh one an a plenty people check fi him.
Time of his life
Holy Moses den di one Red Rat is 'aving di time of his life. Yes mi chile but neyga people waan fi know weh him do wid him next colour him did got. Dem a ask if a Italee a rub off pon him. Massa, smaddy see Red Rat and massa dem a try fi get to him but him deh pon him cellular all di time.
A puzzling affair
Den massa yu eva see mi trial. One set a people ask a weh Zebress gone. Yes one minute she deh a police station di odda miuute she and di odda half pose up inna paper. Yes mi chile dis is more dan puzzlement.
What's the magic?
Mi nuh like fi get inna people business but people a ask weh promoter Gibbons ave a draw di crowd dem a fi him Teen Splash weh a kip a Port Kaiser a year. A wonder if a good luck. Well massa dem seh dem see Gibbons a Santa Cruz di odda nite and massa him a paste up and rub on. Yes mi chile. Where others have floppity flopped, Gibbons have been there and done dat. Nuh seh mi seh.
Babsy creates a stir
Massa wat a crowd round Babsy di odda day. Massa wat a crowd, woman, pickney, dog and pus and massa people inna car a look wat a gwaan. Yes mi chile den di big fat mampy ave di heart fi tap di vehicle she inna and a seh she a go get har money. Wat a ting fi real.
Mistaken identity
Den massa all wen di Baby Cham contest done people nuh a big up Nicobelle, one a di Cham look-alike. Yes mi chile Montel hear seh Nicobelle go pon stage and hear some girls, go Cham go, Go Cham go. Den massa Nicobelle go a one nada show a people a teck him fi Cham same way. Wat a mistake.
